人工燒不盡，春風吹又生。又來到一年一度做Appraisal的季節，無他的，一年到尾，能否升職加人工，食粥食飯就睇今鋪。「怯，你就輸一世」，同年度生日願望一樣，不少打工仔都為此誠心許願，但當腦細堅決唔加人工，你連怯的機會也沒有，點算？

搲加人工前，首先你要……

　　了解市場行情。市面上有各式各樣人力資源報告及調查供打工仔參考，以自行檢查有沒有「Underpay」的情況。當然，同一工種或職位，都因應從屬的行業或企業而有所不同。所以除有關報告，如有認識的朋友從事相關的行業更佳，當收集各路數據，心中大概都知道自己的「價」了。

　　其次，問自己︰工作量與人工是否成正比？人工合符市價，但如果腦細要求你一日接10個Job，幾乎每日都要OT，仲要無補水，情況就猶如一人打兩份工。此情此景，幾高人工也似是收買人命，如果人工只剛合乎市價，而且腦細沒有加薪意欲，更要三思。

　　打工仔提請加薪的另一指標，就是自己過往加薪紀錄。根據去年浸會大學及人才管理協會公佈調查結果顯示，打工仔在2016年平均加薪3.9%至4.1%，比2015年的4.3%至4.7%為低，預料2017年加薪幅度更持續下降至3.5至3.8%。要逆市加薪有難度，但假若過往加薪幅度低於市場平均值，加上能向腦細展示自己良好業績，爭取加人工仍有機。

腦細唔想加人工？先聆聽，後游說，再出絕招

　　最慘慘豬是，腦細一口拒絕加人工要求。打工仔不幸遇上這情況（雖然都經常發生），首先要保持冷靜（因為你已經預咗），然後聆聽腦細解說，即是讓他說明為何你不值得加薪，是因為外圍經濟表現不佳，還是自己表現不濟？前者的話當然不用再深究，（如果腦細年年用同樣借口則作別論），後者的話，可以向腦細了解過去在那幾方面的技能可再作提升，或共同商議其他可行方案，以提升自己的工作效率。

　　當然，腦細日理萬機（好似係），未必會清楚了解你每天的工作日程或須處理的事務，所以打工仔在進行Appraisal時，不妨列出自己的「成績表」，為「想加人工」提出充分證據，並作出適當上訴，證明自己同樣是日理萬機。

　　如果「動之以情，說之以理」都動搖不了你腦細，最後絕招當然是搵工跳槽。說明搵工但不代表認真跳槽，這可視為親身試水溫之舉，比單睇調查報告來得實際。如果有適合的工作不妨一試，但同時可借此與現有職位在人工、工作量等方面作比較，人揀你時你揀人，實行「唔啱都睇吓」。

source:CTgoodjobs