放下書包，拿起公事包，整個世界從此變了樣。曾經痛不欲生嘅FYP，而家睇嚟一啲都唔嘔心，皆因變成打工仔的你，可能每日都做緊幾份FYP。返學你可以咩都唔識，然後傻下傻下畢業。入咗職場你都可以咩都唔識，但一定要識得做人。小編都係個新過吓嘅新人，返工日子唔耐，入世未深，講咗唔應該講嘅野，碰了一鼻子灰。以下事例，可能個個Fresh Grad都做過，然後難免心靈受傷害︰

1/ 講真話被黑面

　　最真嘅說話可能永遠都係最傷人嘅說話。話說有位同事買咗粉紅色嘅電話殼，然問我哋靚唔靚，口直心快嘅我唔覺意講咗句：「隻色好姣呀。」話音一落，現場步入一片死寂……我成功做咗話題終結者。呢個故事教訓我，女生雖喜歡說反話，但更愛聽讚美說話，粉紅色蘊藏咗幾多少女情懷，媽我現在懂了。

2/ 爆錯粗

　　粗口有幾博大精深我諗唔使再講，甚至乎一段友誼都可能因講粗口而起。某日喺公司某間房傾計，有個人佢粗口滿天飛，講到興起，我衝口而出講左句：「X你」。然後見佢面有難色咁，我就知我衰咗喇。本以為大家都熟咗小小，講一兩句好閒啫，但講粗口要講時辰，最緊要講對象（我唔記得講，我X嘅對象原來叫腦細）。

3/ 被無視

　　第一日番工，見到任何人都必須保持笑容。朝早斟水嗰陣，少不了早晨前早晨後。但總會有同事只望一望你然後走開，我心入面不禁默念：「使唔使擺款呀，都係同事啫。」作為薯仔新人，同事未必知我係乜水，唔同我打招呼都好正常。但禮多人不怪，人哋唔講，我都係死死地每日都同佢地講。最後發現，佢走得咁快，原來水機無水。

4/ 被當傻仔

　　坐係自己位，唔出聲無人怪你。行開行埋，係Pantry見到同事你唔傾兩句，場面都幾尷尬。話說有日去洗手間見到同事，有禮地問咗句：洗手呀？然後同事笑而不語。步出洗手間先知自己問得幾白痴，心諗︰「唔係洗手唔通玩水咩？」。搭訕就搭梗架啦，但說話技巧，Fresh Grad還是好好地學一學吧。

　　令人反眼的事情怎會就此結束，返工日子耐咗，會教懂你做人處事，但同時都要提醒自己︰「初心，永遠是最珍貴」。

source:CTgoodjobs