呢個年代，行街睇戲食飯都好，「碌」電話睇Fb同ig，仲有SnapChat簡直就係指定動作。而咁多位前任現任政府高官入面，Jenny如果話前財爺曾俊華（同佢個團隊）最識玩Fb應該冇咩人異議。不過Jenny之前都有講啦，最緊要係肯學肯做唔會避呀嘛！家下特首林鄭亦都見到有進步喇！

林太你做乜唔預埋Jenny呀！話晒Jenny都係年年25嘅青春少艾呀嘛！

林鄭Fb出Po同年輕人吹水

　　要做「網紅」，首先第一件事就係要多啲蒲頭。林鄭家陣處於儲人氣階段，就梗係要出Post密啲先得喇！所以林鄭上任之個Fb專頁，Keep住每隔幾日都有新Post，雖然由80後IO（新聞主任）主理不過文筆就略嫌悶咗少少，有趣啲就好喇！

　　話口未完，林鄭今朝又有新Post啦！原來佢前幾日叫咗班「18區青年網絡」嘅年輕人去禮賓府吹水，梗係啦！口講「肯同年輕人溝通」唔夠嘅，要有行動至得㗎嘛。唉！林太你做乜唔預埋Jenny呀！話晒Jenny都係年年25嘅青春少艾呀嘛！不過話時話，林鄭嘅Fb技巧又提升咗，內文字眼冇咁「新聞處」之餘，仲識係結尾加個「~」代替句號，成件事即刻活潑咗唔少！

 　　可能讀者們會問，呢個「18區青年網絡」係咩嚟嘅呢？其實佢係民政處搞嘅項目，話想畀多啲年輕人機會發揮所長、培養興趣同埋增加自信，仲會鼓勵佢哋積極參與社區事務，加強對社會嘅歸屬感添！之不過，有網民就喺個Post留言，究竟呢班年輕人入面，有幾多唔係建制中人呢？果然識睇梗係睇留言！不過睇返呢個專頁個風格，無論支持定反對，林鄭都概不回應，睇嚟呢個問題都係留返畀心水清嘅網友自己諗啦！

齊昕轉頭像　真係靚女咗？

   　　除咗現任特首林鄭有出Post，前任特首CY……個女齊昕都突然轉咗頭像，有網民就留言話自從CY唔做特首之後，「你人都靚左（咗）」。咳咳，我諗呢位朋友諗多咗啦！事關其實呢張相係齊昕上年影㗎！不過既然CY都為咗照顧家庭而放棄連任，相信佢多咗時間陪屋企人，齊昕自然就會開心咗、開心咯人就自然會靚咗啦！

張相係齊昕上年影落㗎