之前特首林鄭話補選唔會「搞小動作」，大家都喺到估應該係會分開補選。結果上個星期林鄭去行會之前見記者時，先同行家講緊話選管會呢個星期會開會傾吓補選安排，點知過咗兩日嗜，星期四選管會就即出通告話下年3月11日就補選喇！效率之高令Jenny都嘖嘖稱奇！

「哪叱」方國珊似乎想撼工聯會鄧家彪？呢份「不怕海龍王」的決心，Jenny係欣賞嘅！

每區選一席「大和解」味濃

　　正如大家所料，今次補選只係先選咗啲Close file嘅議席，包括終極上訴失敗嘅梁頌恆、游蕙禎喺「新界東」同「九龍西」嘅直選議席;同埋唔諗住上訴嘅兩位前議員羅冠聰喺「香港島」直選議席同姚松炎喺「建築、測量、都市規劃及園境界」嘅功能組別議席。每區都係補選一個議席，甚有同泛民「大和解」嘅意味噃！

　　其實喺選管會未講定詳情之前，建制同泛民兩邊都已經磨拳擦掌，成班人走出嚟話想選。不過睇個勢最激烈嘅應該都係非新界東莫屬啦！

民記工記齊撐Bill

　　Jenny一早收到風，工聯會鄧家彪(阿Bill)為咗增加勝算，入埋民建聯，又頻頻落區蒲頭。民記工記一齊撐，阿Bill都可以話冇得輸！不過點解民記又肯幫工記扶阿Bill上去呢？Jenny估係因為上次工記冇份玩配票所以「嬲嬲豬」，民記都知自己黨搶得太勁所以讓個位出嚟。再加上阿Bill入埋民記，計返條數又好似冇乜蝕，咁工記今次又終於有say，一家便宜兩家著啦！所以幾時都話建制呢啲團隊精神，有時泛民真係要學吓啦！

哪叱不怕海龍王

　　除咗有建制力捧嘅阿Bill，估計喺新東九成九會出選嘅，仲有行中間路線嘅「哪叱」西貢區議員方國珊。經歷咗4次立法會選舉都失敗嘅佢上年終於心灰意冷，話成500萬「姑婆本」都用晒，唔再出嚟選喇！結果今次補選佢又蠢蠢欲動，睇嚟份姑婆本仲有咁上下份量！不過同為女人嘅Jenny就覺得，人有夢想幾時都係好事，不過女人始終多個錢傍吓身，以備不時之需好啲嘅。點都好，「哪叱」呢份「不怕海龍王」的決心，Jenny係欣賞嘅！

「咖哩飯」牙印多 張秀賢選港島難度高

　　而泛民方面，應該係人都睇得出「咖哩飯」新民主同盟范國威想捲土重來，不過佢同民主大黨民主黨牙齒印咁多，得唔得佢哋支持真係好難講;而前「學民仔」張秀賢都有興趣，但係又係同昔日戰友「雙學」反咗面，佢哋兩個嘅票源究竟撼唔撼得贏團結一致嘅民記工記呢？Jenny就真係唔敢太樂觀喇！

　　對比起未開選已經掀起戰幔嘅新界東選區，遠在過咗海嘅港島區就似乎冇咁「火藥味濃」。有傳之前被禠奪議席嘅姚松炎，仲未表態會重奪返喺功能組別嘅議席，但係就有消息話轉戰港島直選，至於成唔成事，就要睇本身取得呢個議席嘅香港眾志有咩決定。姚生直情話，「如果港島區有更好嘅人選，我就(返)去建測界」，之不過眾志個邊好似仲諗緊，姚松炎會唔會轉去直選仲係未知之數。

葉太愛徒即將「起機」？

　　而建制方面，港島不嬲都係新民黨葉太地頭，而Jenny就見到，葉太嘅愛徒Judy陳家珮密密出鏡，似乎好想快啲增加知名度噃！唔通葉太又想幫年輕人「起機」？再加上港島區暫時未見民記有咩聲氣，話唔定Judy真係可以趁今次晉身立會喇！

　　至於另一個主要戰場九龍西同埋唯一一個要補選嘅功能組別「建築、測量、都市規劃及園境界」又會係咩情況呢？Jenny聽日同大家繼續睇！