今日各大新聞媒體都引述消息話，律政司司長袁國強已經向特首林鄭月娥遞咗信，做到今年年尾就會唔Do，而接任人喺出面嘅資深大律師、人稱「公職女王」嘅鄭若驊。如果係堅嘅，咁就可以實現到林鄭上任時曾經高呼「想有多啲女性司局長」嘅願望喇！

早在林鄭公布新班子之時，已經傳袁司長唔會做足5年。

鄭若驊回心轉意肯入「熱廚房」

　　其實袁生辭職嘅消息成日滿天飛，不過就一直都冇明確嘅風講話搵邊個接任，Jenny記得聽過嘅人選有律政司法律政策專員黃惠沖、大律師公會主席林定國；去到近排又傳出消息，話鄭若驊回心轉意，肯入「熱廚房」喇！

　　點解話鄭若驊係「回心轉意」呢？據Jenny八返來嘅消息，事緣係喺林鄭當選之後，曾經一段時間因為組班嘅問題好頭痕，有幾個位都係冇人肯做，當然包括埋律政司司長一職喇。Jenny仲記得，當時有傳言仲講笑咁話，林鄭食咗太多檸檬，搞到胃酸過多先瞓得唔好，其中一粒檸檬就係鄭若驊請佢食架添！

睇嚟聖誕假後至有正式公布

　　林鄭一早就公開講對鄭若驊「非常欣賞和佩服」，明眼人一睇就知佢好恨搵鄭若驊入「熱廚房」，擴充佢嘅「娘子軍」啦！加上鄭若驊一向喺政治方面比較低調，相信都符合到律政司要中立嘅形象㗎。

　　不過，據悉當時鄭若驊就對呢個位冇咩興趣，結果都係由袁國強過渡去新政府，當時袁司長開出咗條件就講到明喺做完「一地兩檢」會走人㗎啦！果然，而家「一地兩檢」三步曲行到去第二步，袁司長辭職嘅消息就嘭嘭聲咁湧出嚟。Jenny今朝都即時問返律政司嗰邊，可惜發言人淨係覆咗句「我們不作評論」，睇嚟都要等司長係北京返嚟先至有正式公布喇！

「一世一生」這膚淺對白

　　正當傳言滿天嘅時候，咁啱港台今日都出咗篇林鄭專訪，問吓袁司長辭職嘅傳聞當言冇走雞，正當Jenny以為林太又係一貫地話「我係唔評論傳言」之類嘅時候，林鄭竟然答咗句「無人可以一生一世」，Timing真係夾到冇得再夾！唔通……林太呢排遇到啲咩傷心事？呢個Moment，Jenny睇嚟都要唱返句：「誰人又相信～一世一生這膚淺對白～」喇！