又到聖誕～又到聖誕！真高興！Jenny同唔少打工仔都已經Plan定點樣好好運用呢個假期喇!特首林鄭月娥都唔執輸，終於放佢上任以來嘅第一次假，由今日冬至開始放，放到26號添！Jenny當時見到個消息嘅時候都大呼一句：「林鄭終於肯放假啦！」

聖誕特別版林鄭卡通公仔。

Email料老是常出現

　　點解Jenny咁大反應？你知喇，雖說特首每年都有22日假期，不過做得特區之首，又點會咁容易就行得開呀！加上林鄭做嘢一向都鍾意親力親為，難得佢竟然肯主動請假，仲要放足5日咁多！Jenny終於都feel到林鄭同我哋呢啲平凡嘅打工仔接近返啲啲喇！

　　有行家同Jenny講，林鄭今次雖然有5日假，不過佢就唔諗住去咁遠，近近地返內地休息吓就算。Jenny都明嘅，以林鄭事事上心嘅性格，返內地放假又近又冇時差，touch wood講句有咩事都可以即日飛返嚟呀嘛！有政府中人都話，就算林鄭放假，佢啲Email都會隨時出現，所以根本就冇分別！

問責官員一半都放聖誕假

　　而我哋「打呔就興奮」嘅政務司司長張建宗，係繼續唔使放假嘅!話時話，大家係唔係未見過林鄭同張司長同一時間放假呢？有人就話係因為林鄭唔多放心將個檔交畀陳茂波(波叔)，所以當林鄭放假或者出trip時，張司長點都要留喺香港主持大局，今次都唔例外！

　　雖然張司長冇得放假（或者係唔願放假），但係其實其他問責官員都走咗一半去過聖誕嚕！其中以創新及科技局局長楊偉雄最疏乎，由今個星期二（19號）就開始放，放到下年1月7號先返，抖足19日，難為佢嘅副局長鍾偉強，就要係呢個普天同慶嘅節假日連chur咁多日喇！