《小傳日記》花旗國作為經濟、軍事強國，總統換人咁大件事，隨時影響到太平洋西岸嘅我
地，所以唔可以唔關心吓。雖然目前未有最後結果，「侵侵」入主白宮幾乎已成定局。
記得八年前，當「侵侵」第一次宣布參選總統時，唔單單係筆者，就連花旗國各界都覺得佢
玩玩吓，志在博見報，就好似當年佢製作真人ｓｈｏｗ節目「飛黃騰達」（Ｔｈｅ
Ａｐｐｒｅｎｔｉｃｅ）一樣，出吓風頭就算，而且當年嘅競爭對手仲要係資深政客、眾望所歸
嘅希拉莉，好多人都完全未諗過「侵侵」會贏，希拉莉遺憾未能成為美國首名女總統。
當年希拉莉意外慘敗，同選前民調結果大相徑庭，好多政治評論家都開始分析箇中原因，例
如鐵鏽帶民心思變、特朗普選舉策略成功、希拉莉不獲女性選民支持等等，同時都離不開兩大因
素。
首先是選舉制度問題，美國總統選舉與別不同，選民投嘅票並非直接計算喺總統參選人份上
，而係睇所在州份嘅多數選民投畀邊個參選人，票數多嘅候選人直接全取州內所有選舉人票。因
此，當年攞到６５８４萬張選票的希拉莉，只係得到２２７張選舉人票，而得到６２９８萬張選
票嘅特朗普反而贏得３０４張選舉人票。
至於另外一個問題，就係部分美國人仲未有心理準備接受一個女總統。筆者有啲愕然，而家
都二十一世紀啦，喺經濟發達嘅美國仲會有性別歧視問題？於是詢問身邊一個來自愛達荷州嘅朋
友，對此佢表示贊同。世人總覺得美國是一個開放又發達嘅國家，但事實上中西部內陸各州民風
相對保守，本來就已經係共和黨鐵膽粉絲，如今要接受民主黨推出嘅女性候選人就難上加難。雖
然不能純粹將選舉嘅成敗單純歸咎於性別問題，但喺關鍵時刻，確實有機會成為最後一根稻草，
民主黨都明白呢點，所以賀錦麗都要搵個白人男性做副手「平衡」，至於被視為民主黨未來總統
人選嘅密芝根州州長屈馬就不在考慮名單之內。
就連ＢＢＣ上月底都報道過呢個議題：「總統女士」對美國來說將係一個新事物，根據合理
推測雖然許多選民喜歡這個想法，但有啲人對呢情況到有啲不安。賀錦麗競選團隊雖然無公開表
態呢個問題，但一名成員最近承認，佢哋認為確實存在「隱藏的性別歧視」，呢種情況將阻止某
啲人投票支持任何女性總統。當然，輸贏仲涉及其他很多範疇，筆者唔想簡單地將結果歸因於性
別問題。但確實好巧合，「侵侵」兩次都大勝女對手，而對住男對手就舉白旗。
侵侵一向支持傳統能源同加密貨幣，佢上台後，投資策略都可能要改一改，例如「侵侵」支
持嘅加密貨幣ＥＴＦ，今日就逆市上升，ＦＡ南方以太幣（０３０６８）升７％，華夏比特幣
（０３０４２）升６﹒９％，嘉實以太幣（０３１７９）升６﹒８％，新火科技控股
（０１６１１）更加飆升１３％。
「侵侵」勝出已經無乜懸念，其「推特治國」嘅風格大家仲記憶猶新，睇嚟大家都要重新適
應吓有「侵侵」陪你嘅日子。請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票
