《小傳日記》自阿爺提議減免港股通股息稅,更加提高北水掃貨中特估嘅興趣,帶動高息中
特估炒高都仲有得升。結果今日就有兩隻國企趁高cap水,五礦(01208)宣布折讓三成
五供二,兗礦(01171)就宣布折讓一成配股,同日孖屐居然出現兩個礦坑!
睇返兗礦,作價17﹒39銀批2﹒85億股新H股,佔擴大H股約9﹒09%,或總股本
約3﹒69%,淨籌49﹒29億銀。佔股本3%以上兼H股9%,cap水規模都真係唔細,
但公告提到差唔多50億銀,主要都係用作償還債務同補充集團一般營運資金。
雖然係大拿拿一間煤炭龍頭,好似應該唔會唔夠錢用到要批股還錢,但事實上兗礦負債水平
確實係高於同行。以2023年度計,兗礦負債比率(總負債╱總資產)有成59﹒76%,比
起2022年度多咗4個百分點有多,而同行神華(01088)同中煤(01898)喺
2023年度嘅負債比率就係23﹒96%同47﹒72%,係明顯地高過同行。至於速動比率
方面亦一樣,2023年度兗礦只有0﹒743,但神華同中煤就分別係2﹒032同1﹒13
,兗礦大為輸蝕,要籌錢還債反而係理所當然,而49億銀對比起高負債更加係九牛一毛。
兗礦話今次批股除咗還債,仲要「補充集團一般營運資金」。早兩日兗礦宣布,出資
15﹒5億人仔認購物泊科技新增註冊資本約4﹒5億人仔,取得物泊科技45%股權,合計持
有物泊科技51﹒32%表決權,令物泊科技成為兗礦附屬公司。據介紹物泊科技係物聯網公司
,兗礦就提到收購有助加速智慧物流產業發展,產生較強產業協同等等。留意返上面提到兗礦速
動比率高於同行,如果物聯網系統可以為兗礦加強物流,降低存貨日數,相信都會大為有利兗礦
提高返流動性。
雖然兗礦流動性低於同行,但有度好,目前兗礦係上述三隻煤炭股入面最高息嗰隻,至今仲
有9厘以上,相反神華同中煤就得返5至6厘,絕對吸引大戶仲肯買新股嘅原因。高息就是皇道
,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票