《魚缸博客》國家有心似乎再扶植內房，融創中國有大資金流入

　　近期國家似乎對內地房地產繼續「落重藥」，先有住建部黨組書記、部長倪虹主持召開座談會，聽取部分房地產、建築業、市政公用行業領域企業負責人意見和建議，後有國家資金繼續落場到項目，似乎好似從死亡邊緣救返來咁。
　　你會問，又話央媽降準、又話減息，點解內房都好似未有咩起色咁？大佬啊，你救人落藥，都唔會俾個病人立即出院啦，如果重病康復，點都需要個三五七個月；就一個行業都係同樣道理，更何況，阿爺而家落曬命令唔可以瘋狂炒上，目前命令係「大水慢灌」、「慢牛」方式對待，不論係樓市定股市都係一樣。更何況，買樓啊，你估買菜咩？點都需要小小時間。
　　好多內房都幾值得擁有，除左國有個班之外，博客比較喜歡融創中國（01918），特別係目前股價都跌到低無可低，特別係個人住房貸款利率聽聞聽日開啟調整，所以今日就有資金考起，融創今日成交額有成20幾億，算係內房入面比較出色的一個。
　　其實內房講到尾都係炒個信念，如果信念唔夠真係唔好落場，中國會唔會無房地產市場？絕對唔會。會唔會繼續打壓？博客覺得已經到尾水。幾時會升？答你唔到，反正明年今日你睇返，就知道自己買得對不對。

《編者按》本欄搜羅即市傳聞，惟消息未經證實，《經濟通》亦不保證內容之準確性。