《魚缸博客》比特幣日日破頂，買相關ETF好過炒股啦！

　　癡線啦！成個市場已經癡晒線啦！講緊係比特幣市場，個個而家都FOMO緊，「空」軍個個都被人夾到大叫：「我唔玩啦，俾返啲錢我。」
　　點解比特幣升到咁癲？主因當然就係特朗普交易啦，大家都估佢上台會對加密貨幣做出規範指引，憧憬未來投資基金、散戶可以更有信心入場，令加密貨幣成為投資/避險工具；另一方面，聯儲局減息都有利加密貨幣市場，融資成本更低更容易入場。
　　咁FOMO係咪就無危機呢？根據博客預計，十萬美元大關應該好快到，甚至可能幾日甚至幾個鐘就到，不過相信十萬大關一定有堆「鯨魚」出貨，畢竟到呢個關口點都要套現，特別而家環球經濟都唔係特別明朗，風險敞口更高，所以十萬關可能反CUP跌落去都唔出奇。
　　不過中長期而言，比特幣依然係值得投資產品，特別係基金嘅資產負債表，都會係一個重點入場項目，所以如果睇中長線的話，今日高位明日低位囉。
　　係香港，關於比特幣ETF包括A南方比特幣(03066)、FA三星比特幣(03135)、華夏比特幣(03042)、博時比特幣(03008)，其實隻隻都差唔多，關鍵都係管理費同掛勾槓桿問題，睇自己能力同需求就係，所以如果係玩中長線投資，呢堆ETF都係必要考慮之選。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。