《魚缸博客》有草姬渣手見好就收，博客同你細數原因

　　今日隻草姬(02593)上市，號稱歷來第二大「超購王」．香港公開發售部分超額認購約6082.63倍，呢個數字博客「吓」左一聲；再睇睇今日表現，「吓」左第二聲；再睇詳細掛牌資料，「吓」埋第三聲。

　　超購六千幾倍，一手中獎率得3%，應該人人都想要搶貨先係，但定價依然係下限3.75銀定價，博客覺得而家股票界開善堂咩？咁好心？一睇今日表現，高開25%，最多上過5.05銀，成交額一個上午都係兩億，之後都係穩步係4.5銀上落，所以你明白點解博客「吓」咁多聲啦？

　　即係話，超購6000幾倍嗰啲數字係咩？而家買股票都流行買新樓嗰套一個人可以八張飛？老老實實超購咁多來講，首日上市表現真係好弱，咁博客都明點解下限定價，因為上限定價睇情況必然跌穿招股價，肉酸又無謂啦；而家下限定價又唔破發，散戶賺餐茶，大家開心咪算。

　　如果你有持貨，博客建議你今日有賺好走，最好唔留過夜，俾多一口息都無謂；如果你無貨，你當睇唔到就ok啦，個莊似乎都唔太「給力」，等佢回到一兩蚊睇下會唔會有大戶入場跟風炒下啦，而家呢個情況都係繑埋雙手睇下表演算。

《編者按》本欄搜羅即市傳聞，惟消息未經證實，《經濟通》亦不保證內容之準確性。