《小傳日記》涉軍爭議仲有變數，騰訊打法律戰或者行得通！

　　《小傳日記》隔晚，花旗國國防部突然拋出一份「中國軍方合作企業」清單，搞到港股股王
騰訊（００７００）應聲爆跌超過７％，直接跌穿３８０蚊關口，仲創咗自２０２４年１０月以
嚟嘅新低，市值蒸發咗超過２５００億！唔少人都好奇，呢份清單究竟有咩來頭？騰訊被列入清
單又會有咩影響？
　
　　呢份「中國軍方合作企業」清單其實係花旗國《２０２１財年國防授權法》第１２６０Ｈ條
授權底下，由花旗國國防部推出嘅「黑名單」。簡單啲講，就係專門針對神州軍民融合發展嘅企
業，界定條件包括公司被神州軍方直接或間接控股，或者被認為係神州國防工業基礎嘅支持者。
一旦公司被列入呢份清單，將會禁止同花旗國國防部合作，以及限制同國防部有貿易往來嘅企業
進行合作。呢啲限制對於科技類企業嚟講，影響雖然未必即時顯現，但長遠而言有機會影響到國
際合作同技術供應。
　
　　但呢啲企業被列入清單嘅證據都未必實淨，以往案例之中有啲理由都幾匪夷所思。好似之前
小米（０１８１０）起訴五角大樓嗰陣，花旗國話小米創辦人雷軍喺２０１９年獲得神州工信部
頒發嘅「優秀中國特色社會主義事業建設者」獎，都算係同解放軍有合作嘅證據，最後可能係因
為證據唔夠強，小米喺２０２１年就成功從名單中剔出。
　
　　至於神州大數據公司籮筐科技都曾經被列入清單，喺法院，花旗國指控該公司同發改委下屬
機構簽署過戰略合作協議，以及旗下子公司同涉軍企業有合作。但花旗國法庭發現，國防部嘅證
據全部都係公開資料，例如新聞報道或者公司網站內容，冇任何實質證據證明同神州軍方有直接
關係。
　
　　再睇返騰訊嘅基本面，表面上似乎同「神州軍方合作企業」清單嘅界定條件唔太對口。首先
，騰訊嘅五大股東入面有三間係美資公司，其餘係先前大手筆減持嘅南非股東同馬化騰。其次，
騰訊主要業務係遊戲、在線廣告、社交網絡、金融科技同雲服務，２０２３年嘅收入大部分都係
來自ｔｏ　Ｃ（面向消費者）嘅業務，基本上同軍方業務冇乜交集，退一百萬步講，就算騰訊有
咩「國家級任務」喺身，都唔會咁易俾你知啦。
　
　　面對突如其來嘅黑名單，騰訊今日都發表咗聲明，話會同美國相關部門溝通，搞清楚誤會。
話唔定騰訊會採取之前小米同籮筐科技應對方法－－直接起訴美國國防部，畢竟有成功嘅先例。
再者，有關禁令最早都要等到２０２６年６月３０日實施，騰訊宜家仲有好長時間可以處理。無
論如何都好，事件對騰訊嘅實際業務影響應該唔大，但唔排除外資股東隨時嚇怕套現，投資者就
算趁低吸納都要做少少心理準備，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。