《魚缸博客》大股東長和又捱鬧，ＴＯＭ集團股價急升唔通有搞作？

　　《魚缸博客》魚缸今早有頭威無尾勢，雖然早段曾經升近２００點，但來到呢刻已經倒跌過
百點。大市繼續炒業績，有人歡喜有人愁，績優嗰啲唔一定就升，升得多嗰啲又唔敢追，怕後面
唔知會唔會配股抽水。所以，搞到小散戶心慌慌，唔知點算好。通常個市悶悶地，就好容易出現
炒作股！果然比筆者估中，今日ＴＯＭ集團（０２３８３）最多飆５２％，冠絕魚缸升幅榜，不
過ＴＯＭ集團只係隻毫子股，要炒起炒落容乜易。
　
　　ＴＯＭ集團大股東係長和（００００１）大家都唔陌生，長和近期因出售海外港口業務成為
市場焦點。而批評文章到今日仲繼續出，今日港澳辦再度轉載《大公報》有關長和計劃出售巴拿
馬運河港口等資產報道，內容除咗一如之前咁，質疑有關交易並非「在商言商」。仲希望（長和
）重新考慮交易，強調今次唔係普通商業買賣，應選擇同國家同一陣線。並希望有關企業慎重，
或者重新考慮交易，又形容長和至今仍未回應事件，表現令人失望。
　
　　筆者心諗，唔通超人心灰意冷，連ＴＯＭ集團都要賣？唔係點解近日股價咁大波動？提起
ＴＯＭ集團，相信有返咁上下股齡嘅散戶都聽過當年嘅花名「湯篤金」，當年上市時盛況空前，
無人不知。但「湯篤金」近年已經沉寂咗好耐。不過，股價近日開始有炒作。上個禮拜五，股價
曾經炒高６５％，高見０﹒７９銀，不過收市縮到得一成升幅。前日雖然升幅無咁誇張，都最多
都曾升１８％。不過咁，呢兩日成交唔算多，分別得果百幾萬股同二十幾萬，相反，今日成交多
番，暫時已經挨近９００萬股。　　
　
　　ＴＯＭ集團股價升咁多，搞到筆者心郁郁，想搭下順風車，賺返餐晏仔。但睇到ＴＯＭ集團
３月１０號公布嘅業績，舊年蝕多１６％去到２﹒５６億銀。筆者睇完，當堂一盆冷水照頭淋。
股價都升咗咁多，入去容乜易接火棒？何況，阿媽長和出售港口件事仲未塵埃落定，後面有幾多
風險上未可知，所以，呢段時間買入就要做好風險評估。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。