《小傳日記》唔再與輝同行，都可「俞輝」同行，東甄尚未變餘暉？

　　《小傳日記》持續大半年嘅東方甄選（０１７９７）風波，最終都係逃唔過分手命運，始於
都係要脫離東方甄選。不過上星期俞敏洪出席業績會就暗示，公司並唔係同董宇輝完全割席，未
來更加有可能會合作。
　　而近期與輝同行嘅動作都暗示緊「合作」係大有可能。呢幾日就有神州網民發現，與輝同行
曾經多次申請註冊多個「俞輝同行」嘅商標，分類涉及社會服務、廣告銷售，甚至係教育娛樂等
等。雖然東方甄選唔再與「輝」同行，但由老闆「俞」敏洪本人與「輝」同行都唔係唔得，呢一
堆申請註冊商標正好為孖屐豐富遐想。
　　多個朋友點都好過多個敵人，孖屐推測由與輝同行親自申請註冊「俞輝同行」商標，證明其
實董宇輝同俞敏洪之間並唔係真係有太大分歧，只不過分開吓真係對大家都有利，正正就係所謂
刺蝟法則，既可以減少出現類似之前嘅口舌之爭，亦可以降低與輝同行獨立初期嘅難度。
　　事實上，孖屐有唔少人都唔太睇好獨立後嘅與輝同行，其中東方甄選嘅著名對手羅永浩就認
為董宇輝一定要搵到生意合作夥伴。的確，董宇輝出道以來都係以「文人」嘅形象行走江湖，雖
然交到數，但賣嘅係個人魅力，並唔係真正嘅生意手腕，如今獨立出來，兼顧嘅有更加多，係好
需要有一個更個有生意頭腦同手段嘅人幫佢做好管理工作，先可以為茫茫前路打好底。
　　目前與輝同行自立門戶一星期多啲，成績都係相當彪炳，單係７月２５至２９五日，與輝同
行帳號就多咗１２萬粉絲，ＧＭＶ仲成功過億人仔。如果未來董宇輝真係仲識得黐近啲東方甄選
，相信帶來嘅協同效應都可以大大紓緩雙方分手後嘅不適，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。