《楠楠自語－莫灝楠》日股何來爆炸一說？

　　其實日經真係淨係可以代表部分日本大企業，因為基恩士、迅銷等幾間公司佔比太高，亦不是用市值計算，而是用股價大小決定權重，所以不能代表整體日本股市。
　
　　最近日股其實表現唔錯，好多遊戲、IP類股份同金融股都大升。金融股主要因為日本加息，日圓升，息差拉闊；IP股升，因為好多新Game賣得好好。

　　東證指數依家預測PE為14.9，日經225接近20。係咪好貴就見仁見智，但你都可以話部分sector貴，部分sector其實還好。
　
　　攞幾隻日股嚟做例子，最近其實好多日本IP公司都有出新遊戲或者影視作品。
　
　　萬代南夢宮即大家熟悉嘅Bandai，高達、鹹蛋超人(Ultraman)、假面騎士（香港應該比較多人叫幪面超人）、龍珠、海賊王等等，其實全部都出自Bandai。最近龍珠《DRAGON BALL: Sparking! ZERO》銷量非常好，加上高達推出《Gundam Seed Freedom》大電影，提振了公司業績。
　
　　另外Capcom、Koei等著名IP公司，最近都有出新遊戲，例如《Monster Hunter》和《真．三國無雙　起源》等。遊戲新浪潮亦帶動索尼(SONY)的硬件收入。

　　銀行方面，三菱日聯、瑞穗等受惠日圓升值、加息等因素。市場預期未來利息收入增加，利率周期改變，自然對銀行構成結構性增長，最近一年已經升超過40%。
　
　　其實部分大型日本企業都有在美國ADR甚至OTC上市。投資日股其實沒有想象中困難。香港市場亦有對沖日圓匯兌風險嘅華夏日股對沖ETF(03160)，如果怕日圓貶值亦非常啱使。《南華金融集團副總監　莫灝楠》
　
*《經濟通》所刊的署名及/或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。